'Kameleoia' dantza ikuskizuna Arrasaten [ZAPATUA, 19:30]

Dantzaz konpainiako zuzendari nagusia Fernando Sainz de Ugarte da eta Kameleoia lanari buruz egin du berba: "Donostiatik kanpo estreinatzen dugun lehen tokia izango da Arrasate. Iaz maiatzean izan zen estreinaldi handia, eta nahiz eta talde baten ekoizpen berria ezagun izateko urtebete inguru igarotzen den, ongi doala esango nuke".

Kameleoia ikuskizunaren berezitasunengatik galdetuta, energia eta publikoarekiko hurbiltasuna aipatzen ditu Sainz de Ugartek: "Oso garrantzitsuak dira biak. Dantza garaikidea egin gura dugun arren, edozein publikorentzako oso hurrekoa izatea da asmoa eta lortzen dugula iruditzen zait".

Musikari dagokionez, barrokotik garaikidera igarotzen direla gaineratu du. "Few Brief Sequences piezako musika, esaterako, oso seduktorea da eta dantzariek ere seduzitzeko dituzten tresna guztiak erabiltzen dituztela esango nuke". Bestetik, aspalditik konpainian dagoen Itzik Galili koreografoaren bi pieza ere dantzatuko dituzte bihar Amaian: "Batak gure produkzioari ematen dio izena: Chameleon. Aulkiekin egiten da, eta emakumearen keinuetan oinarrituta dago; umore pixka bat du, baina gai sakonetan sartzen da; emakumearen nortasunean, adibidez. Bestalde, badago dantzari guztiek parte hartzen duten pieza bat: Things I told nobody; kasu horretan, Mozarten eta Vivaldiren musikaz lagunduta dantzatzen dute".

Dantza zaletasuna sustatzen

Aurreko ikuskizuna ere ekarri zuen konpainiak Arrasatera: "Kontuan hartuta dantza emanaldietara jende gutxi bertaratu ohi dela, kasu hartan publiko kopuru polita elkartu zen. Oraingoan ere errepikatu egin gura dugu, horrela dantza komunitatea, sarea, handitzen joango ginateke-eta. Hori ere gure helburua baita, dantza-kultura sustatzea; ikastetxeekin ere aritzen gara hori lortzeko.