Zuhaitz Eguna zapatuan Arrasaten, espezie jangarriak landatzea helburu

Joan den egubakoitzean ikastetxeetako haurrek Markulete inguruan landatu zituzten arbolak.
Arrasateko Udalak Zuhaitz Eguna antolatu du zapatu honetarako, hilak 22, herritar guztiei begira. Iaz lehen aldiz antolatu zen ekimena herritar guztiendako eta aurten errepikatzea erabaki dute. Musakolako Antoniñaerreka inguruan Udalak duen 14 hektareako lursail baten egingo dira landaketak. Arrasate Institutuko goiko eraikinaren aparkalekuan elkartuko dira, 10:00etan.

Iaz 20 gaztainondo eta 20 intxaurrondo landatu zituzten eta aurten beste horrenbeste landatzea da asmoa. Udalak 14 hektareako lursaila dauka Hidalgo baso moduan ezaguna den parajean eta datozen urteetan bertan landatzea da Udalaren helburua.

Espezie jangarriak landatu

Zer landatu? Espezie jangarriei eman gura diete lehentasuna, Ingurumen teknikari Pello Garairen arabera: "Jangarriak diren espezieak oso interesgarriak dira. Beste barik basora joan beharrean, intxaurrak edo gaztainak biltzeko aukera izango genuke. Gainera, fruituok guztion lurretan jasoko genituzke". Gonbidapena egin diete herritarrei, ez da-eta lan astuna izango. Landatzeko materiala Udalak jarriko du, baita hamarretakoa ere. Arropa erosoa eta botak eramatea gomendatu dute.

Hidalgo baso balioan jartzea

Udaleko Ingurumen Saila Kurtzetxiki balioan jartzeko lanetan ari da orain buru-belarri, baina Garaik aurreratu duenez etorkizunerako asmoa da gauza bera egitea Hidalgo bason: "Bertan Kurtzetxikin baino lehenago joango zen prozesua, eta guk geuk zenbait landaketa egingo genituen. Hori bai, herritarren parte-hartzea ezinbestekoa izango da". Era be

Zuhaitzen garrantziaren transmisioa

Era berean, Zuhaitz Eguna familian igarotzeko proposamena egin du Ingurumen teknikariak: "Zuhaitzen aldeko kontzientzia piztea gura dugu. Oso hunkigarria da ikustea haur batek zuhaitza landatu eta 20 urte barru zuhaitz horren itzalean egotea". Hala, gurasoei dei egin diete seme-alabekin bertaratzeko.

Lurrari lotuta gaudela gogoratu gura izan du Garaik: "Basoak dira gure planetaren birikak, gure birikek hartzen duten oxigenoa garbiagoa izateko ezinbestekoak dira zuhaitzak".

Zuhaitz Feriaren arrakasta

Bestalde, zapatuko Zuhaitz Feriaren balorazio positiboa egin du Garaik; bertan egon zen goiz osoan: "08:30etik hasi eta 12:00ak arte jendea etengabe ibili zen, etengabe. 12:00etatik aurrera makaldu zen apur bat baina jende asko ibili zen. Horrek animatzen gaitu datorren urtean ere Zuhaitz Feria antolatzera".

 

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.