Helburuetan eta sistemaren ezaugarrietan adostasuna lortu ondoren, mahaiak proposatu du herrigunean hondakinak gaika jasotzeko "kontrolpeko edukiontzien sistema erabiltzea". Horrek esango gura duena hala azaldu dute erredakziora bidalitako prentsa oharrean: "Herritarrek ez dute nahastuko hondakinen frakziorik eta bilketa zerbitzuari banatuta entregatuko zaizkio, nahitaez". Horrez gain, fiskalitate ekologikoa aplikatuko dute.
%70 gaika biltzea ez bada lortzen, atez atekoa
"Helburuak hasiera hasieratik edo bederatzi hilabeteren buruan lortuz gero, sistema balekotzat emango da, eta gaika jasotzeko zerbitzua sistema horren bidez egiten jarraituko da. Aldiz, edukiontzien sistema ezarri eta bederatzi hilabeteko epean aurrez adostutako gaika jasotzeko %70eko helburua lortu ezean, sistema baliogabekotzat joko da, eta Arrasateko herrigunean hondakinak gaika jasotzeko zerbitzua atez ateko sistemaren bidez egingo da".
Akordioa, aho batez
Akordioa aho batez lortu da, Hondakinen Mahaian parte hartu duten alderdi eta eragileen artean: Bildu, EAJ, Aralar, Arrasate Garbi, Zero Zabor taldea, Ekologistak Martxan eta Ezker Anitza. Deituak izan arren parte hartu ez duten PSE-EE eta STOP PaP elkarteari gonbidapena bidali zaie akordio horretara atxiki daitezen.