Zaborrontzi mota bakoitza proba moduan jarriko da, herrian jende mugimendu handiena izaten den guneetan: Gorostiza, Kurtzetxiki, Biteri eta Zaldibarren. Aurrerago, Legarra plazan eta Galizia kalean ere jarriko dira. Zakarrontzi hauek jartzen diren guneetan, hiri hondakinetako lau frakzioak modu selektiboan botatzeko aukera izango du jendeak: organikoa, papera, ontzi arinak eta errefusa.
Uztailaren 5ean hasi eta pare bat hilabetez egongo dira zakarrontziak proban eta ostean erabakiko da, lehendabizi Zerbitzuetan eta gerora Tokiko Gobernu Batzarrean, zein modelo den egokiena gerora ezartzeko. Zakarrontzien erresistentzia (euria, kolpeak...) eta hondakinak bertotik ateratzeko erraztasuna dira balorazioa egiterakoan kontuan hartuko diren irizpideetako bi.
Hiru zakarrontzi mota
Gaiaren azterketa sakona egin ostean, eta eskaintza ezberdinak aztertu ostean, hiru zakarrontzi mota aukeratu dira proba egiteko: Arrizabal enpresaren Atrium eta Maia modeloak (4.462,48 euro), eta Gallaz Joma, SL enpresaren Joma Su. Zakarrontzi Selektiboa (3.093,73 euro).
1000 zaborrontzi berrerabiliko dira
Aukeratzen den zakarrontzi mota Arrasateko lekurik esanguratsuenetan ezarriko da. Gainontzeko guneetan, berriz, egun dauden zakarrontziak jarriko dira, launaka, lau frakzioak jasotzeko. Horretarako, egun dauden 1.000 zakarrontziak berrerabiliko dituzte, egungo beharretara moldatuz. Horrenbestez, egungo zakarrontziak berrerabiliz moldatutako lau frakzioko zaborrontziak Arrasateko 250 puntutan ipintzen joango da Udala, 2013 eta 2014an zehar: haur-parkeetan, autobus geltokietan, paseatzeko lekuen hasiera eta bukaeretan… jende mugimendu gehien izaten den guneetan, azken finean.