"Aretxabaletako mahai politikoak, hurrengo udal hauteskundeetan alkategai izateko egin didan proposamenari baiezkoa eman diot", adierazi du Iturbek. Azken urteetako esperientziak eta ikaskuntzak bultzatu dutela baietza ematera gaineratu du: "Gogotsu nago udaletik nire ekarpena egiten jarraitzeko. Ikasitakotik eta hobetzeko dudanetik, elkarlanean eta elkar hartuta, pausoak ematen jarraitzeko gogoz nago".
Era berean, bidelagun izandakoak izan ditu gogoan: "Urte hauetan bidelagun izan zaretenon gertutasuna eta zaintza beharrezkoak izan ditut momentu pertsonal zein profesionalei aurre egiteko. Aurrerantzean ere gertu nahi zaituztet".
Lanbidez, irakaslea
Iturbek 2023an hartu zuen alkate kargua, EH Bilduk hauteskundeak irabazi ostean. Aurretik, irakasle lanetan jardun du Aretxabaleta Lanbide Eskolan; delineazio industrialeko goi mailako zikloa ikasi zuen lehenengo, eta ondoren, mekanizazio arloko ingeniaritza teknikoa.