Oraindik Euskaraldiko enbaxadore izatearen kontzientziarik ez duela onartu du, baina argi dauka non jarri behar den azpimarra: "Erabileran. Niretzat euskara garrantzitsua da erabileragatik, gehienbat, ze, nahiz eta jakin, ez dugu askotan behar beste egiten. Aretxabaletan bertan, zoritxarrez, ehuneko txiki batek erabiltzen dugula esango nuke".
Euskarak apaingarri izateari utzi behar diola gehitu du: "Korrika eta Euskaraldia moduko ospakizunetan beti ateratzen garelako Gora euskera! esaten, eta gero, atzealdetik, erdarara jotzen dugu".
Arlo pertsonalean, oro har, lagunekin euskaraz egiten duela esan du, salbuespenak salbuespen: "Ikusten badut norbait erosoago sentitzen dela gazteleraz, edo kostatzen zaiola euskaraz egitea, gehiago egiten diot gazteleraz".
Eskoriatzako Udalean laster
Atzegiren Pauso Berriak formakuntzaren bidez Aretxabaletako Udalean egin zuen praktikaldia Elkorok, eta laster Eskoriatzako Udalean jardungo du. Badu anekdota bat bi herriekin lotutakoa: "Aretxabaletako Udalean nenbilela, herritarren bat gazteleraz etortzen bazitzaidan, esaten nion Eskoriatzara joan zedila. Orain, Eskoriatzan berdina gertatzen bazait, euskaltegira joateko esango diot, euskaraz hitz egiten ikas dezan".
