Bi kreditu txertatzea Udal aurrekontuan izan dute hizpide udalbatzako kideek. Lehenengoa, 229.700 eurokoa; eta hori dagoeneko prest dago inbertsioak egiteko. Bigarrena, 3.430.100 eurokoa da; kopuru hori kontuan izanik, jendaurrean jarri behar da ikusgai, alegazioak egiteko epea zabalduta.
Bi kreditu horiek gehituta 2025eko Udal aurrekontua 14.832.250 euro izatetik 18.492.050 eurora izatera pasatu da: "Gobernu Taldeak hartutako konpromisoa betez. Aurtengo aurrekontuaren exekuxioa ez dela %100ekoa izango jakinda, proiektu batzuk bukatuta egotea espero da, eta beste batzuk, hasita edo lizitatuta uztea da helburua, proiektuaren arabera".
Horri esker 51 partida onartu dituzte, horien artean "inbertsio garrantzitsuak", hala nola, 700.000 euro kaleak asfaltatzeko; 468.000 euro Gipuzkoa plazan eremu estali bat sortzeko; 350.000 euro udal zerbitzuetan hobekuntzak egiteko; eta 300.000 euro udaletxean igogailu bat instalatzeko.
Horiez gain, kiroldegian inbertsio handia egin gura da Fagor Ederlan lantegiko hondar-beroa aprobetxatzeko; horrek, "energia-kudeaketa eraginkorragoa eta instalazioen hobekuntza" ahalbidetuko du. Autobus-geltokietan –50.000 euro–, haur-parkeetan –75.000 euro– edo landa-bideetan –50.000 euro– ere egin nahi dira inbertsioak.
2026rako geratu diren beste hainbat lan ere nabarmendu gura izan dituzte, proiektuak aurten idatziko direlako: Durana –40.000 euro– eta Lausitta –50.000 euro– kaleetan eta pilotalekuan –40.000 euro–, hain zuzen ere. Herriko hainbat lekutan desfibriladoreak jartzeko asmoa ere badute.
Hona hemen kredituen dirua bideratuko den inbertsioetako batzuk:
| Inbertsioak | Kredituak (eurotan) |
|
Asfaltatze-lanak |
700.000 |
|
Gune estalia Gipuzkoa plazan |
468.200 |
|
Zerbitzuetako inbertsioak |
350.000 |
|
Udaletxeko igogailua |
300.000 |
|
Ederlaneko beroa aprobetxatzeko inbertsioa |
255.000 |
|
Landa finkak erostea |
100.000 |
|
Kiroldegiko instalazioa |
100.000 |
|
Patio inklusiboa |
75.000 |
|
Umeen parkeetan inbertsioak |
75.000 |
|
Igogailua Iturrizar plazan (obra) |
70.000 |
|
Kuartelean hobekuntzak |
56.000 |
|
Autobus geltokietan inbertsioak |
50.000 |
|
Lausita kalerako proiektua |
50.000 |
|
Durana kalerako proiektua |
40.000 |
|
Pilotalekua egokitzeko exekuzio proiektua |
40.000 |
|
Saneamenduan hobekuntzak |
50.000 |
|
Baserri bideetan inbertsioak |
50.000 |
|
Bide publikoak: seinaleztapenak, zebrabideak argiztatu |
30.000 |
|
Desfibriladoreak |
7.000 |
Plan estrategikoa onartuta
Osoko bilkura horretan datozen lau urteetarako dirulaguntzen plan estrategikoa ere onartu dute. Bi laguntza-lerro berri sartu dituzte hor: "Berrikuntza gisa, Garapen Ekonomikorako Sailean bi laguntza-lerro berri sortzea planteatu da, bat hirugarren sektorera bideratuta eta bestea Aretxabaletako merkataritza bultzatzeko helburuarekin", azaldu dute Udal Gobernuko kideek. Laguntza horien oinarriak laster argitaratuko dituzte.
Bestalde, 2024ko aurrekontuaren likidazioa jakinarazi da. Aurreikusitako inbertsioak abian jartzeko udalak erabil dezakeen soberakina handitu egin da: "Eta horrek behar adinako finantza-gaitasuna emango du datozen bi urteetan Aretxabaletako azpiegiturak nabarmen eraldatu ahal izateko".
