Kurtzebarri eskolako zein BHIko ikasleek energia-iturri eskuragarrien eta ez-kutsatzaileen erabilera aztertu dute azken ikasturtean; hain zuzen ere hori da Garapen Jasangarriaren 2030erako jarritako helburuetako bat.
Argiteria publikoari buruz egin duten azterketak agerian utzi du zerbitzu horretan "hobekuntzak egin behar" direla. Eta horren adibide batzuk eman dituzte; kiroldegira heltzen den bidegorrian dauden faroletako batzuk behar bezala ez dabiltzala nabarmendu dute, eta Durana kalekoak zikin daudela. Argien intentsitateari dagokionez, uste dute "herriko hainbat guneen artean desoreka" dagoela, eta horrek "segurtasun-sentsazioari eragiten" diola.
Emisio kutsagarriak murrizten laguntzeko udaltzainen ibilgailuek elektrikoak izan beharko luketela ere jaso dute eta herriko hainbat gunetan kargagailuak jartzea proposatu. Era berean, hondakinak lurrera ez botatzeko zakarrontzi gehiago eskatu dituzte. Kurtzebarri eskolako teilatuan instalatuta dauden eguzki-plakak berriro martxan jartzea ere proposatu dute.
Ekintza-plana
Aurten egindako diagnostikoa hurrengo ikasturterako ekintza-plan bat zehazteko oinarria izango da, horren helburua "energia aurreztea" izanik. Horren baitan, ikasleek konpromiso batzuk hartu dituzte: zuhaitz landaketan eta ibaiaren garbiketan parte hartuko dute, aurkitutako hondakinei buruzko informazioa zabalduz. Era berean, "kale-argien funtzionamenduaren eta garbiketaren jarraipena" egingo dute, Udalari haien egoeraren berri emateko. Energiari dagokionez, sentsibilizazio-kanpaina bat antolatzea beharrezkoa dela iritzi diote.
Proposamen horiek guztiak Unai Elkoro alkateari aurkeztu dizkiote, eta horrek ikasleek egindako lana eta hartutako konpromisoak txalotu ditu: "Gogoan hartzen dugu helarazi digutena, eta eskerrak ematen dizkiegu egindako ekarpenengatik". Eta azpimarratu du Udalak "eraginkortasun energetikoa hobetzeko eta jasangarritasunaren alde lanean" diharduela.