Aretxabaleta hobetzeko proposamenak zehazteko helburuarekin etapa ezberdinetako ikasleek lanari ekingo diote. Lanketa horren emaitzak gero, udal ordezkariei aurkeztuko dizkiete; 2022ko maiatzean egingo duten osoko bilkura berezian izango da hori. Udalerriaren egoera hobetzeko irtenbideak aurkeztuko dituzte orduan, Udal ordezkariei proposamen zehatzak aurkeztuta, eta norberak bere konpromisoak azalduta. "Izan ere, garapen iraunkorraren bidean pausoak ematen jarraitzea denon ardura da eta Udala zein herritarren inplikazioak duen garrantzia nabarmenduko da", adierazi dute lanketaren gidari izango direnek.
Kurtzebarri eskolak, Kurtzebarri institutuak eta Aretxabaleta Lanbide Eskolak hartuko dute parte aurten Eskola Agenda 2030 egitasmoan. Hala, haur hezkuntzako, lehen hezkuntzako, derrigorrezko bigarren hezkuntzako eta lanbide heziketako ikasleek jardungo dute gaiak lantzen, eta guztien artean, herriko "diagnostiko borobila" osatzea da asmoa.