"Udaletxeko balkoian jarri dugu gailua lehenengo probak egiteko", jakinarazi du Unai Elkoro alkateak eta gaineratu: "Datu asko emango dizkigu. Hala, zirkulazioaren gaineko erabakiak hartu behar ditugunean datuetan oinarrituta izango dira".
Kopurua eta abiadura neurtu
Neurgailua astelehenetik domekara bitartean egongo da martxan, 24 orduz, trafiko gehien duten egunak eta orduak ere ezagutzeko. Udaletik jakinarazi dute aforatzaileak ez duela matrikula-irakurgailurik, beraz, ez direla ibilgailuak identifikatzen. Helburua trafikoaren parametroak neurtzeko datuak biltzea dela zehaztu dute.
Lehen neurketa Otalora kalean egin ostean, Udalak aforatzailea beste toki batzuetan jarri gura du: "Abiadura neurtzea ere interesgarria izango da. Kexak izan ditugu horren harira, eta horrela jakingo dugu gehiegizko abiadurarekin gidatzen den edo ez", dio alkateak.
HAPOaren prozesu barruan
Udaleko Plangintzako zinegotzi den Ion Albizuk azaldu du neurketaren helburua: "Herriko trafikoaren portaeraren argazki orokor bat izatea, kaleetan jasotako datuekin mapa bat egitea". Datorren urtean hasiko direla neurketa zehatzak egiten gaineratu du: "Egia da egoera honetan jasoko ditugun datuak zenbateko fidagarriak diren ez dakigula. Domekan, esaterako, 23:00etatik 05:00etara bitartean auto bakarra pasatu zen Otaloratik".
Neurketa hau Hiri Antolamenduko Plan Orokorra (HAPO) egiten hasi aurreko prozesuaren barruan sartzen da. Lurzoruaren erabilerak arautzeaz gain, hiri-hazkundearen eredua ezarriko duen udal araudia da HAPO. Lehen pauso moduan, Plan Orokorrak diagnostiko faseari ekingo dio, eta, besteak beste, udalerri barruko mugikortasuna aztertuko dute.
HAPOaren lehen fase hori agintaldi honetan bukatzea da asmoa, eta urtea uste bezalakoa ez izan arren, hasieran ezarritako epeak beteko dituztela uste du Albizuk. Horren barruan dagoen parte-hartze prozesua moldatu egin beharko dutela egoerara ere gaineratu du.