Herriko "ehun ekonomikoari bultzada" emateko unea dela uste dute EH Bilduko kideek: "Zailtasunak dituztenei lagundu eta hobekuntzak egin nahi dituena laguntzea gure konpromisoa da". Horretarako hainbat proposamen egin dituzte, "garatze prozesu bat" beharko dutenak: "Alkateari helarazi dizkiogu eta proposatu dugu eztabaidatzeko hasiera izatea".
Mikrokredituak eta inbertsiotarako laguntzak
Batetik aditzera eman dituzte mikrokredituak (20.000 euroko partida); merkatariei, ostalaritza zerbitzuei, profesionalei eta enpresa txikiei eskaintzeko izango lirateke, krisiak sortutako "unean uneko beharrei" erantzuteko eta inbertsioak egiteko: "Eguneroko ordainketak egin, behar diren inbertsioei aurre egin edo egoerak eskatutako moldaketak egin ahal izateko. Enpresei likidezia ematea da helburua", adierazi dute EH Bilduko kideek. Interesik gabeko kredituak proposatzen dituzte eta aztertzekoen artean izanik 2021etik aurrera ordaintzen hasteko aukera.
Bestetik, likidezia duten enpresei inbertsioak egiteko ahalmenean laguntzea proposatu dute (80.000 euroko partida), hobekuntzak egiteko; horien artean aipatu dituzte erakusleihoan moldaketak, irudi korporatiboa landu, promozio bereziak egin eta material berria erosi. Egindako inbertsioaren "ehuneko jakin batekin laguntzea" izango litzatekeela asmoa diote.
Hirugarren proposamena da "bideragarritasuna bermatuta" duten negozioen beharrei eusteko laguntzak (20.000 euro), eguneroko gastuei aurre egiten laguntzeko: "Laguntza lerro berezi bat sortuko da bideragarritasun plan batean oinarrituta".
Zaborren gaineko tasa
Ildo beretik, EH Bilduk uste du zaborraren gaineko tasa ez dagoela ondo zehaztuta eta "profesionalak kaltetzen" dituela, bereziki. Horregatik, hainbat jarduerei zabor tasa jaistea "era iraunkorrean", proposatu du: "Aurtengo tasak jaisteko erabakiak egonkor bihurtzea izango litzateke helburua. Beti ere sortzen den hondakinaren araberakoa proposatzen da".