"Herritarrek gero eta gehiago erosten dutela Interneten uste dugu, eta horren aurrean, protesta gisa, jarri dugu abian kanpainatxo hau", adierazi du Aretxarteko zuzendaritza batzordeko kide Usoa Etxebarriak, eta gaineratu: "Egia da aretxabaletarrek erosten dutela bertako komertzioetan ere, baina kontzientzia har dezaten gura dugu, geure egin dugun Bizi erosi Atxabaltan leloarekin bat eginez". Herriko merkataritza desagertuz gero zer gertatuko litzatekeen ere aurreratu du Etxebarriak: "Kaleak ilun, bizitasunik ez herrian, asko igarriko litzateke, zalantzarik gabe, eta ez onerako". Hala, bizirik mantendu gura bada guztien beharra egongo dela uste dute Aretxarteko kideek.
Harridura sortu
Martitzen arratsaldean jarri zituzten lehen kartelak eta segituan sortu zuten herritarrengan harridura: "Aho zabalik geratu dira asko, kezkatu ere egin dira hainbat, eta segituan etorri zaizkigu galdetzera. Hain zuzen, hori zen kanpaina honen helburua; harridura sortzea lehenengo, eta gero, zer pentsatua ematea".
Antzeko kanpainak beste herri batzuetan ere egin izan dituztela gogorarazi dute; plastiko beltzarekin erakusleihoak estali, esaterako. Aretxabaletar batzuei eraginkorra iruditu zaie eta beste batzuek ez diote graziarik topatu: "Broma dela esan diegu galdezka etorri direnei, baina, era berean, serio hartzeko kontua dela ere bai, etorkizunera begira jarrita ondorioak larriak izan daitezkeelako guztiondako".
Bezeroak zaindu
Aretxarte elkartea 58 kidek osatzen dute; horietatik 39 merkatariak dira eta 19 tabernariak. Oraingo kanpaina bereziki merkatariei bideratua izan arren, tabernariek ere bat egin dute horrekin. Herriko bezeroa zaintzen ahalegintzen da Aretxarte, eta, horretarako, urtero egiten ditu hainbat kanpaina; Gabonetan, esaterako, egutegiak oparitu eta bonuak zozketatu.