Udal eta Foru hauteskundeak 2015

Unai Elkoro: "Ekonomia, kudeaketa eredu berria eta zaborren gaineko galdeketa izango dira gure ardatzak"

Leire Kortabarria 2015ko api. 18a, 13:07

Aretxabaletako EAJk Joseba Egibarren babesarekin aurkeztu du gaur, zapatua, udal hauteskundeetan aurkeztuko duen zerrenda. Unai Elkoro zerrendaburuak honako hau esan du: "Talde anitza da, afiliatuz eta independenteez osatua". Nabarmendu duenez, "gardentasuna eta hurbiltasuna" izango dituzte oinarri, eta ekonomia eta enplegua, kudeaketa eredu berria eta hondakinen bilketa sistemaren gaineko herri-galdeketa dira euren programaren ardatzak.

"Bilduren alternatiba" gisa aurkeztu du bere lantaldea Unai Elkorok; "gardentasunez, hurbiltasunez eta zintzotasunez" jokatuta, "denondako Aretxabaleta" egiteko gertu dagoena eta gazteak eta esperientziadunak uztartzen dituena.

Azpimarratu du azken hilabeteotan herriko "eragile askorekin" batzartu direla eta herritarrengandik hurbil egon eta "komunikazio ona" eduki gura dutela.

Programaren hiru puntu nagusien gainean, honako hau esan du: "Lehenengo gaia ekonomia eta enplegua izango da, eta ekonomia arloko eragileekin gertutik jardungo dugu". Arreta handiena emango dioten bigarren gaia "gobernantza eta kudeaketarako eredu berria" izango da. Eta hirugarren gaian, zabor bilketa sisteman, "herritarrei hitza emango" dietela eta "gehiengoak nahi duena errespetatuko" dutela agindu du.

Bukatzeko, Bilduk azken lau urteotan egin duen gobernuaren balorazioa egin du: "kudeaketarako ezgaitasuna eta ekimen eza" kritikatu ditu, eta baita "inposaketa" eta "ados jartzeko borondate eza" ere.

Joseba Egibarrek, bere aldetik, "eskerrak" eman dizkie denei "herrigintzan jarduteko prest" egoteaatik, eta azpimarratu du EAJk "askatasuna" ematen diela talde-buru guztiei, "ahalik eta zerrenda egokiena" osatu dezaten.

Hau da Aretxabaletako EAJren zerrenda:

  1. Unai Elkoro
  2. Nerea Etxabe
  3. Aitor Gabilondo
  4. Mikel Uribeetxeberria
  5. Pili Leanizbarrutia
  6. Jose Miguel Uribarren
  7. Karmele Uribarri
  8. Eduardo Altube
  9. Mari Carmen Hermosa
  10. Txomin Landaluze
  11. Arritxu Oliden
  12. Iñaki Astiasaran
  13. Mari Asun Isasmendi

Ordezkoak:

  1. Adoratriz Herrasti
  2. Aitor Saez de Azkunaga
  3. Haritz Solupe

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak