Oraingo sistema aldatzen hasi aurretik lortu gura diren bilketa tasetara iristeko ez dela "behar besteko ahalegina" egin uste dute EAJkoek. "Sentsibilizazio, informazio eta formazio kanpaina eraginkorrak garatu eta bultzatu behar dira. Herritarrak motibatu, erantzule sentitu eta euren borondatez hondakinen kudeaketaren erantzukizunean parte hartzeko", zioen Haritz Solupe zinegotziak.
Lore Martinez Axpe –Ingurumen zinegotzia– ez zen bat etorri horrekin: "2012ko maiatzaz geroztik gabiltza informatzen eta sentsibilizazio kanpainak egiten". Eta hau gaineratu zuen: "Borondate onarekin ez goaz inora, derrigortuta bakarrik lortuko ditugu emaitzak". Gai organikoa jasotzeko bosgarren edukiontzia 2008az gero dagoela gurean aipatu zuen, baina "sei urtean ez dela lortu atez atekoarekin lor daitekeen tasarik".
EAJko zinegotzien iritziz, ez da behar beste bultzatu bosgarren edukiontzi horren erabilera: "Esperientzia pilotu bezala jaio zen eta hala jarraitzen du". Eta horren adibide jarri zuten bosgarren edukiontziak 23 direla herrian eta berdeak, ostera, 86.
"Urkulun zabor zuloa?"
Aralarko zinegotziek, ostera, Arrasateko konponbidearen alde egin zuten, 9 hilabeteko probaldia %70eko tasak lortzeko bosgarren edukiontziarekin eta errefusa jasotzen duenarekin. Bildukoek erantzun zioten "negoziatzeko gertu" azaldu zirela eta edukiontziei txipa jartzea ere onartu eskatutako moduan, baina Aralarrek ezetza eman ziola azkenean proposatu zitzaien guztiari. EAJkoak, ostera, "maximoekin" joan zirela negoziatzera gaineratu zuen Bilduko Iñigo Louvellik: "Eskatzen zenuten egungo sistema mantentzea eta hortik ez zenuten aldendu gura".
Herritarrak ere elkartu ziren osoko bilkurako aretoan; hondakinen kontuari "adarretatik heltzeko" eskatu zioten EAJri eta Aralarri "Bilduk egin duen moduan", eta alternatiba errealak planteatzeko eskatu. Eta galdetu zieten: "Urkulun zabor zulo bat gura duzue?".
Bada, eztabaida luzearen ostean ez zuten onartu mozioa, Bilduko sei zinegotziek aurka bozkatu zutelako, Aralarko hirurak abstenitu eta EAJko biek bakarrik babestu.
Beste bi mozio
Horrez gain, beste bi mozio aurkeztu zituen Bilduk osoko bilkuran: Emakumeen autonomiaren eta erabakitzeko eskubidearen defentsan bata eta atxiloketen gainekoa bestea. Biak aho batez onartu zituzten.
