Aramaixo Tropikaleko Gazte Asanbladatik hauxe adierazi dute, jaiak pasa berritan: "Jaiak aurrera eraman dira eta jendetsuak izan dira. Gero beste gauza bat da zein preziotan". Nabarmendu dute aurtengo jaiak "inoiz baino gertakari gehiagokoak" izan direla.
Udalak hartutako erabakiengatik, esan dute asanbladakoei tokatu zaiela "sekula baino lan gehiago egitea", eta uste dutela "itzalpeko lan hori guztia, itzalpekoa den momentutik, ez dela horrenbeste ikusten".
Jaietan izandako hainbat gertakariren inguruan ere mintzatu dira, baina horietatik aldendu nahi izan dute.
Egitarauaren balorazioa
Egitarauaren balorazioari dagokionez, osteguneko GKSren eguna "brillantea" izan zela nabarmendu dute. Zapatuan, berriz, Udalak txosna inguruan egitaraurik "antolatu ez zuela jakinda", azken orduan boxeo-belada antolatu zuten. "Pilak jarri genituen eta giro itzela izan zen", azaldu dute.
Zapatu gaueko Chech Boys eta Blind taldeen emanaldiak ere arrakastatsuak izan zirela diote.
Domekan, kebap-jana bertan behera geratu bazen ere, Berbapasie eta film laburren lehiaketak urteroko giro onean pasa zituztela nabarmendu dute.
Astelehenean, nekea nabaria bazen ere, parte-hartze ona izan zela azaldu dute, esaterako kuadrillen arteko pikean eta bertan, adiskidetasuna gailendu zela diote.
Orain, jaiak amaituta, jasotze lanetan dabiltza.