Aramaion sortzen den hondar organiko guztia herrian bertan tratatu eta kudeatzeko helburu eta estrategiaren baitan, udalak auzo-konpostaje guneei buruzko bilera informatiboa deitu du martitzenerako, udaletxeko osoko bilkuren aretoan, 18:00etan.
Gaur egun Ibarran bi auzo-konpostaje gune daude, baina Gorbeialdeko Ingurumen teknikari Jon Toñak adierazi du asmoa dutela herriko auzo-konpostaje guneen azpiegitura handitzeko, eta, horrela egingo dela 2025. urtean zehar. Izan ere, gaineratu du gaur egun Aramaion auzo-konpostajea egiten dutenen parte-hartze maila "ona" dela, baina hori "hobetzea" dela euren asmoa.
Bilera, interesa dutenendako
Bilera zuzenduta dago auzo-konpostaje gunetan parte hartzeko interesa daukan edozein herritarri, baina bereziki gonbidapena modu zuzen batean bideratu diete Aramaioko elkarte gastronomikoetako lehendakariei eta horietako gainerako kideei. Hauxe azaldu du Toñak: "Bereziki elkarte gastronomikoetako lehendakariei zuzentzen diegu deialdia, ondo dakigulako elkarte gastronomiko horiek direla kantitate aldetik hondakin organiko edo biohondakin gehien sortzen diren guneak. Beraz, eurei zuzendu nahi izan gara bereziki. Baina deialdia zabalik dago interesa daukan edozein herritarri. Guztiei animatzen diegu auzo-konpostaje guneetan parte hartzera".
Bileraren helburua
Auzo-konpostajearen funtzionamendua zein den azalduko dute bertan, horietan parte hartzeko bete behar diren irizpideak zehaztuko dituzte eta jendea parte hartzera animatu nahi dute. Izan ere, Aramaion eta baita Gorbeialdeko Kuadrillan biohondakinen kudeaketarako bultzatzen ari diren estrategia oinarritzen da hondar organikoaren tratamendu lokalean eta bi aukera eskaintzen dituzte; etxeko konposta indibiduala egitea edo auzo-konpostajea.
Irizpideak edo jarraibideak
Auzo-konpostajea egiterakoan garrantzitsuena da gaikako bilketa zorrotza egitea: "Organikoaren tratamenduak daukan berezitasun edo baldintzetako bat da oso hondar organiko garbia edo gordina jaso behar dugula, tratamendua gero ondo egin ahal izateko. Eta horrek eskatzen duena da jatorrian, bereizketa horretan, oso zorrotz jokatzea", azaldu du Toñak. Herritarrak gonbidatu ditu bilerara joan eta informatzera.
