"Misio horretan ikusiko dira bi erreskate, nahikoa gogorrak, gainera. Gauzak kontu handiarekin egin behar dira, ze arriskua da jende dena itsasora jausi eta itotzea. Prozesu nahikoa luzea da; kanpotik ikusita, ematen du gogoa... hartu 200 pertsonak eta hustu, eta zure itsasontzira eraman, baina oso prozesu zaila da. Eta, honekin batera, ikusiko da Libiako soldaduekin izandako arazo txiki bat; tiroketa bat ere egon zen, beraiek eskatzen zutelako erreskatatutako jendea beraiek eramatea bueltan Libiara", dio Arriaranek pelikularen edukiaren gainean galdetuta.
Gaur egun, honela dago egoera, Mediterraneoan eta erreskate kontuei dagokienez, bestetik: "Berdin jarraitzen du, latza. Bi asteotan albiste beldurgarriak entzun ditugu: 200dik gora pertsona itota hil dira; beste bi itsasontzi Libiakoek eraman dituzte bueltan bertara; beste itsasontzi bat ikusi zuten egun baten jendez beteta, eta handik bi egunera hutsik ikusi zuten, eta ez dakigu jende hori non dagoen. Egunero ari gara gauza hauek ikusten. Eta gure egoera duela hilabete batzuetakoa modukoa da: ez dugu erreskaterako baimenik. Une honetan Lesbosen gaude; bertara joan ginen, erreskate lekutik gertuago egoteko, baina baimen barik". Eta erreskate lanetarako gertu dauden itsasontzi denak daude egoera berean, Izaskun Arriaranen hitzetan Europak ez dituelako errefuxiatuak bere lurretan nahi.
Izaskun Arriaran bera zapatuko emanaldian izango da, gaiari buruzko azalpenak emateko: "Eskola mailan ere zerbait egin dugu; eta hau aukera ona da herriak ikusteko Euskal Herri mailan oraindik asko hedatu ez den dokumental hau. Poztekoa da".