Energiaren, elikaduraren eta turismo eta asialdiaren alorrean herri burujabearen bidean Aramaion egin diren urratsak eta aurrera begira dituzten asmoak erakutsi dituzte gaur, Titipi-Ttapa... Pausoz pauso, Aramaio burujabetzarantz! jardunaldian.
Idoia Beitia, Ingurumen zinegotziak kontatu du, herritaren aurrean erakutsi gura izan dutela, burujabetzarako "hiru hankak" posible direla: "Biomasa proiektua da burujabetza energetikoari dagokionez erakusgarri nagusia, dagoeneko martxan duguna. Elikadurari dagokionez, Ekonomatoa da egindakoaren adibide garbiena". Herrian bertan ekoitzitako askotariko jakiak eta beste toki batzuetatik ekarritako jaki ekologikoak saltzen dira bertan. Gaur egun 80tik gora bazkide ditu, gehienak herrikoak nahiz eta ez den derrigorrezko baldintza.
Burujabetza sozio-ekonomikoa da hirugarren hanka, hain zuzen ere, turismoarekin lotutakoa. Amillena elkartekoak eman dituzte alor horretan egindakoen azalpenak: "Berreskuratutako tokiak eta ondarea balioan jarri eta erakustea da asmoa, horretarako, besteak beste, hainbat ibilbide eskainiko ditugu. Orain urte eta erdi inguru sortu genuen taldearen egitura formalizatzea eta bidez-bideko proiektuarekin ekitea dira mahaiaren gainean ditugun asmoak" azaldu du Jone Arriolabengoak, Amillenako kideak.
