Zalantzarik gabe, Antzuolako jaietako egitarauari erreparatuta nobedade esanguratsu bat dago aurten. Antzuolar batzuek, agian, gogoan izango dute nola Ondarreko plaza zezentoki bihurtzen zen duela urte asko; bada, aurten, berriz itzuliko dira, jaietako domekan, arratsaldeko seietan hasita. Lau hamarkada igaro dira azkenengoz han bigantxak egon zirenetik. "Egon izan dira bigantxak Antzuolan, baina txikienei bideratuta, bigantxa txikiekin eta bestelakoekin. Duela bederatzi urte egon ziren azkenengoz herrian. Ondarreko plazan, ordea, berrogei urte izango dira ez dela zezenketarik izan", dio Imanol Lizarraldek, Antzuolako Udaleko zinegotziak.
Lizarraldek gaineratu du ohiko formatuan itzuliko direla: "Ondarreko plaza hesiekin inguratuko da eta handik plazarako bidean dagoen kalea ere gehituko diogu oraingoan". Bigantxei dagokienez, Endoiako (Gipuzkoa) Albara ganadutegikoak izango dira, eta zazpi bigantxa ekarriko dituztela adierazi du zinegotziak.
Plaza zaharrak errekuperatzen
Bigantxak Antzuolara itzultzearen arrazoietako bat Euskal Zezenzaleen Elkarteak duen helburuetako bat da: plaza zaharrak errekuperatzea. "Bigantxak egon izan diren plazak errekuperatzea bultzatzen dute eta hemen ere aukera ikusi zuten horretarako, eta aurrera atera da. Esaterako, gurean, Eskoriatzan ere berreskuratu dituzte, eta badakit Zegaman ere berriz egon direla", dio Lizarraldek.
Udaletik bigantxak itzultzearen alde egin duten arren, Imanol Lizarraldek argi du ikusi egin beharko dela nolako erantzuna izaten duten: "Itzultzearen alde egin da, baina badakigu denetariko iritziak egon daitezkeela. Dena dela, aurten probatu egingo dugu, eta ea ze erantzun eta harrera izaten duten. Ondoren, balorazioa egingo da, eta horren arabera erabakiko da datozen urteetan errepikatuko dugun edo ez".
Udalaren gonbita eta oharrak
Jaietako egitarauko nobedade nagusienetakoa izanik, Udalak gonbita egin die herritarrei bigantxak ikustera eta haiekin gozatzera joan daitezen. "Seguruenik, kanpotik etorriko da jendea; zezenketetan ibiltzen direnak, alegia. Ea Antzuolako jendea ere animatzen den", dio Antzuolako Udaleko zinegotziak. Gonbita egiteaz gain, ohar bat ere utzi nahi izan du: "Azpimarratu nahi dugu 16 urtetik gorakoek bakarrik dutela parte hartzeko aukera. Adin horretatik beherakoek debekatuta izango dute sartzea; izan ere, guk kontratatzen ditugu aseguruak 16 urtetik gorakoentzat dira".
