Gaur zein atzo egitaraua osatzen duten zenbait ekintza egon arren, hilaren 18ra arte itxaron beharko da Antzuolako jaiei hasiera ofiziala eman ahal izateko. Txupinazoa izango da festari abiapuntu hori emango dion ekintza. 12:30ean izango da hori, Herriko Plazan.
Zapia jartzea
Omenaldiek pisu handia hartzen dute jaien lehen egunean, eta horiek zapia jartzearen forma izaten dute. Ohikoa den moduan, adineko bi pertsona eta jai batetik bestera jaio diren haurrak izango dira protagonistak.
Adinekoei dagokienez, emakumezko bat eta gizonezko bat izaten dira omenduak, eta zehaztuta dago nortzuk izango diren zapia jasotzeko pribilegioa izango dutenak. "94 urteko Antonia Fernandez Saco eta 91ko Felix Larrea Kortabarria izango dira aurten omenduko diren pertsonak", dio Jone Larrañagak, Kultur teknikariak.
Ondoren, jaioberrien txanda izango da. Hain zuzen, hamahiru haur jaio dira jai batetik bestera. Guztiek jaso dute gonbidapena, eta zapi bana izango dute zain udaletxean. Zapi horiei dagokienez, aurten, betirako izango den zapia atera dute, baina, Larrañagak dioenez, omenduen zapiek berezitasun bat izango dute: "Haien zapiek urtea izango dute idatzita, oroigarri modura gorde dezaten".
Dantzak
Jaien lehen eguneko beste momentu garrantzitsu bat dantzak izaten dira. Urtero bezala, Oinarin Dantza Taldeko gaztetxoenek ikurrin dantza egingo dute plazan, 20:00etan hasita. Dantzekin jarraitzeko, udalbatzako hainbat kidek soka dantza egingo dute elkarrekin.
Une berezia izan ohi da hori Oinarinekoentzat, baina aurtengoa bereziagoa izango da, bi dantzen artean egiten den ban- dera eta ikurrina jasotzea haiek egingo dute eta. Urte hauetan guztietan kulturaren eta herriaren alde egindako lanari aitorpena izango da: "Egunero lanean ibiltzen dira, entseatzen edo besteei dantzak erakusten. Gure esker ona adierazi nahi diegu".
Zuzeneko emankizuna
Hain justu, Goiena ere jaien hasierako ekitaldian izango da, zuzeneko emankizunaz gozatzeko aukera izango baita Goiena telebistan eta goiena.eus atarian, 19:45etik aurrera.
