Gaiaz gehiago jakiteko Aitziber Sarobe biologoa eta natura kontserbazionistaren hitzaldia antolatu zuten martitzenean eta ekitaldiaren amaierako zatian plataformak euren asmoei buruz hitz egin zuen: "2002an dekretu bat egin zuten izapidetze-prozesura egin zuten, eta orduan udaletxetik jarduera-lizentzia bezala joan beharrean, industria-baimen bezala dator; eta horren barruan, ingurumen-eragina. Hori da guk gehien landu behar duguna".
Mugak, erronkak, zailtasunak
40 herritar elkartu ziren Saroberen trantsizio energetikoaren mugak, erronkak eta zailtasunak hitzaldian. Administrazioak bere lurralde plan sektorialaren bidez eman nahi dion aterabideekiko hausnarketa egitea zuen helburu hitzaldiak: "Natur kontserbazioan gabiltzanon ustez, planteatzen zaigun eredua, landa eremuan modu intentsiboan energia ekoizteko planteamendua ez da egokia; besteak beste, krisi energetikoari biodibertsitatearen krisia gehituko zaiolako. Krisi batetik beste batekin ezin da atera. Hausnarketa merezi du, jatorrizko arazoari garrantzia kendu barik".
Era berean gehitu du badirela beste modu batzuk "ez hain intentsiboak" direnak eta tokian tokiko planteatu daitezkeen ereduak. "Eredu horietatik eta artifizializatutako lehendik zoru bihurtutako eremuetatik hasi beharko genuke. Ez dela nahikoa izango? Ziurrenik ez, baina has gaitezen hortik eta irabazi dezagun denbora, besteak beste, dugun arazoaz jabetzeko", dio.
Hurrengo batzar irekia
Meaka-Irimo herri plataformak azaroaren 20an egingo du hurrengo batzar irekia Olaranen 18:30ean. Batzarrean parte hartzeko deia egin zieten herritarrei: "Alegazioen bidea lantzen eta proiektuari eman beharreko erantzunak pentsatzen joango gara". Bestalde, hilaren 29rako EHUko Ingenieritza Energetiko saileko irakasle Alvaro Camposen hitzaldia antolatu dute.
