Antzuolako Udala herriko berdintasun diagnosia egiten ari da urte hasieratik Emagin elkartearen laguntzarekin eta zapatuan kalera atera zuen orain arteko lana, herritarrei galdetegi bat betetzeko gonbidapena luzatuz. Berdintasun ikuspegitik nola bizi diren esparru baten edo bestean eta aurrera begira egiteko zer dagoen galdetzen die, besteak beste, herritarrei.
Orain arte jasotakotik, baina, ideia batzuk hartu dituzte eta horien gaineko gogoetak partekatu gura izan dituzte Emagin taldeko kideek antzuolarrekin. Herriko hainbat eragile eta kolektiborekin egon dira elkarrizketak egiten eta datuak jasotzen: hezkuntza arlokoekin, migranteekin edo erretiratuekin, esaterako. Behaketa bat ere egin dute herriko espazio publikoan, eskola inguruan, tabernetan edo zaintzan, esaterako, zer nolako herritarrak ibiltzen diren ikusteko. "Oso herri bizia dela konturatu gara eta berdintasunarekin proaktiboa dela ere ikusi dugu, eta horrek aukerak biderkatu egiten ditu gauza ezberdinak egiteko aukerak", adierazi du Emagin taldeko Miren Arangurenek.
Josune Martinez berdintasun zinegotziak esan du Udalaren asmoa dela honi jarraipena egitea: "Hurrengo aurrekontuetan partida bat jartzea eta plan bat egitea Antzuola mailan berdintasun politikak indartzeko zertan eragin behar dugun ikusteko". Martinezen esanetan, feminismoaren olatua iritsi da Antzuolara eta berdintasunaren aldeko kontzientzia badago herrian. Egun, gizarte zerbitzuetako teknikariak laguntzen die berdintasun gaietan, baina uste du gaia ondo lantzeko aukera bat izan daitekeela Antzuola, Elgeta eta Leintz Gatzagak gizarte zerbitzuetatik duten Bideberri Mankomunitatearen bitartez egitea, berdintasunaren politikez arduratuko den langile bat egotea hor hiru herriendako. Oraindik, baina, guztiz landu gabe dute aukera hori.
