"Hauteskundeetan eta legegintzaldi hasieran agindu genuen gauza bakarra da. Izan ere, herrian sumatzen da herritarrek ez daukatela garbi herriarena zer den. Aurrekontuen gaineko parte-hartze prozesuan gai honek kezka sortzen duela ikusi genuen", dio Ima Beristain alkateak. Horregatik, orain teknikoak eta politikoak elkarrekin, aurre-diagnosi bat egiten dihardute gero, herritarrekin lantzeko. "Iraila eta urria bitartean diagnosia egingo dugu; azaroa eta abenduan, aldiz, herritarrekin partekatuko dugu", gaineratu du.
"Herriko gune guztiak aztertuko dira; batzuk ez ditugu ukituko, baina azalpena emango diegu herritarrei, jakin dezaten ze erabilera duten. Olaran, esaterako, erabilera handiena duen eraikina da. Publikotasuna indartu edo pribatuari lekua egin arautuko dugu herritarrekin".
Udaletxeko irisgarritasuna
Udaletxeko irisgarritasun lanek daukatela lehentasuna azaldu du Beristainek. "Jende askorendako ezinezkoa da bulegoetara etortzea. Horregatik, sarrera egokitu behar dugu eta igogailua jarri. Hori ez da aukera bat, derrigorrezkoa den beharra da".
Diagnosi teknikoa
Hirigintza teknikari Valen Monuxek azaldu duenez, espazio eta eraikin publikoen gaineko fitxa informatiboak egingo dituzte: "Udalaren eraikinen eta aisialdiguneen gaineko azterketa teknikoa egingo dugu. Bakoitza nolakoa den definituko dugu eta hauen ezaugarri teknikoa jasoko da fitxan". Ondoren, fitxa horietan jasotzen dena herritarrekin kontrastatuko da azaroan.