Juan Ramon Garai, Zabaloren lagunak azaldu digunez, hileta hunkigarria eta laburra izan zen. "Hil aurreko egunetan eskatu zuen Zabalok hileta zibila izan nahi zuela; eta hala egin zaio, laburra eta hunkigarria izan da". Zapatuan, ekainaren 8an, hil zen Jose Luis Zabalo 69 urte zituela. LKIko militante ezaguna izan zela gogorarazi digu Garaik: "LKI desagertu zenean, ere, militante izateari utzi zion arren, beti izan da ezkerreko pertsona".
Jose Inazio Garitanok ere ondo ezagutzen zuen Zabalo, eta gertukoa zuen. "Herriko gizona izan zen. Oso zabala zen, bere ondoan bizi izan gara betidanik, lagun handiak izan gara. Herritar asko gerturatu da eskolako patiora; lehen hileta zibila izatean, jendearen arreta ere piztu du. Uste dut jendeak ez zekiela hileta zibila egiteko aukera zegoenik Antzuolan", dio Garitanok.
Orain 4 urte arautua
Pilar Etxanizek gogorazi digu, aurreko legegintzaldian, zinegotzi zela, hileta zibilak arautzeko iniziatiba aurkeztu zutela orduko udal taldean. "Gizartea laikoa da eta udala erakunde moduan akonfesionala. Fededun katolikoek badute non egin azken agurra, elizan. Garrantzitsua dela uste genuen hildakoei agurra egitea eta bizitzaren zikloa ixtea. Baina erritual erlijiosoekin identifikatuta ez geundenok hutsune bat zegoela ohartu ginen", azaldu digu. Hala, hileta zibilak egiteko prozedura arautzeko bidea egin zuten. "Gure egunerokotasunean ez daude horrelako ekitaldien erreferentziarik, eta oinarri bat utzi behar zela uste genuen", dio Etxanizek.
Udalean informazioa
Hileta zibila egiteko interesa duen edonork, udalera jo dezake informazio bila eta bertan, familiak adostu ditzake udalarekin lekua eta bestelako xehetasunak. "Eskolako patioan egin daitezke hiletak, baina familiakoek beste tokiren bat gura izanez gero, udalean adostu dezakete; baita ordua ere. Beharrezko dokumentazioa eta xehetasunak edonork dituela eskura azpimarratu nahi dut", nabarmendu digu.