Eguraldia lagun izan dute Oñatiko ikasleek Korrika Txikian. Ohorezko gonbidatuak izan dira gainera ekimena girotzen: Potx, Izaskun eta Xabi Sound. Bizikletan, furgoneta barruan zein patinetan ibili dira hirurak giroa jartzen, kantatzen eta ikasleei animoak ematen.
Txantxiku Ikastolako lehenengo mailako ikasleek eman diote hasiera Korrika Txikiari, plazan. Kale Barritik gora joan dira, eta Etxaluzen zain zituzten Elkar Heziko kideak. Hauek, Santa Marina plazaraino eraman dute lekukoa, eta Urgaineko ikasleei eman. Bertatik plazara joan dira, hurrengo mailako ikasleei lekukoa eman, eta ibilbidea berriro egiteko. Lehenengo mailatik seigarren mailara arteko ikasleek hartu dute parte ekimenean.