Martxoaren 28an helduko da Korrika Oñatira eta horri ongietorria egiteko sortu den batzordeak antolatu ditu, dagoeneko, hainbat ekintza horri begira. Bezperan, 27an, egingo dute Korrika Txikia –herriko hiru ikastetxeetako Lehen Hezkuntzako ikasleek hartuko dute parte, 14:30etik 16:30era, herrigunean– . Gauargi taldeak ere orduan egingo du erromeria, 17:00etan hasita, eta kantu afaria ere egongo da Pago Uso elkartean.
Korrika Kulturalaren barruan, berriz, Gartxok bakarlariak joko du Eltzian martxoaren 18an; 22an, berriz, Belharra taldeak gaztelekuan. Laburbirako film laburrak ere proiektatuko dituzte zinema-aretoan 25ean, eta Potx eta Lotx pailazoen ikuskizunak ere jasoko du Korrikaren kultura eskaintzak.
Materiala saltzen
Zapatuan, otsailak 21, bestalde, Korrikako materiala saltzeko mahaia jarriko dute plazan. Zuhaitz azoka egingo du egun horretan Natur Eskolak, eta landareen eta loreen postuen artean jarriko dute Korrikakoa.