Urtebetetze oparia izan zitekeen Iñigo Erlerentzat San Migel torneoan jokatu duen bosgarren finalean hirugarren txapela janztea, baina ez da posible izan. 2 eta 0 jarri dira aurretik, eta binako eta bosnako berdinketen ostean, Galarza eta Sotil gehiago izan dira, eta haiendako izan da txapela (22-9).
Oñatiarrak sari-banaketaren ostean adierazi du, halako aldearekin "zaila" izaten dela partidari buelta ematea. "Ez zegoen zulorik beste bikotean. Sotil, atzelaria, oso ondo egon da. Gainetik pasa nau, eta Iñaki Galarzak partidu borobila egin du. Beñat Apezetxeak ere ahal zuen guztia egin du, eta alde horretatik plazer handia izan da finalera heldu arteko partida guztiak berarekin jokatzea. Emaitzarekin baino prozesuarekin gozatzea tokatzen da", azaldu du.
Partidaren hasieran sartuta egon dela dio, baina, gero, egoera aldatu egin dela: "Beñatek guztia eman duela uste dut ahal izan duen heinean, eta niri neurea ematea falta izan zaidala uste dut".
Julen Sotil eta Iñaki Galarza garaileak pozik agertu dira garaipenarekin. Sotilen esanetan "oso ongi" sartu dira partidan hasieratik: "Partida ona egin dugu, Beñati ez diogu utzi sartzen jokoan, eta deseroso zegoen. Gure helburua atzea kargatzea zen eta ongi atera zaigu".
Gazte mailan txapela Bergarara
Aratz Ormaetxea bergararrak ere gazte mailako finala jokatu du Iker Izagirrerekin batera, eta txapela eskuratu dute Manex Olaiz eta Aitor Etxebarriari 22-17 irabazita.
Partidua nahiko parekatua izan dira hasieratik, baina hamabira heltzen lehenak izan dira Ormaetxea eta Izagirre, eta markagailu horren ostean, Olaiz eta Etxebarria hurbildu badira ere, aurretik joan dira. "Partidua gogorra izan da hasieratik, nahiko parekatua izan da. 16-15 geundenean apurtu dugu pixka bat. Hiru tantoko aldea hartu dugu eta hori aprobetxatuta 22ra heldu gara eta pozik egindako partiduarekin.
