Oñatiko jaiek eztanda egiteko oraindik ere egun batzuk geratzen diren arren, gaur dagoeneko nabaria zen Oñatin ez zela iraileko ohiko asteburu bat. Izan ere, Haur eta Gaztetxoen Egunaren baitan Atsolorra ekitaldia egin dute.
Aurreko urteko jaietatik aurtengoetara bitartean jaio direnei ongietorria egiteko modua da Atsolorra eta gaur 90 ume inguruk hartu dute parte bertan; batzuek ia urtebeterekin, baina egon da baita ere orain aste bat baino gutxiago jaiotakorik. Ekitaldia hasteko, alkatea buru izan dutela udalbatzako hainbat kidek zapiak jarri dizkiete umeei osoko bilkuren aretoan eta gero talde argazkia atera dute denek batera Foruen Enparantzan.