Urtarrilaren 1ean, goizeko 06:25 inguruan izan zen gertakaria Oñatin, eta 32 urteko gizonezko bat atxilotu zuen Ertzaintzak, bost laguni labanarekin eraso egitea leporatuta.
Atxilotua Bergarako epaitegiaren esku utzi du gaur Ertzaintzak eta epaileak espetxeratzeko agindua eman du. Martutenen dagoela adierazi dute Ertzaintzatik.
Bestetik, bost zaurituak –lau gizonezko eta emakumezko bat–, Arrasateko Ospitalera eraman behar izan zituzten eta horietako bati hankan ebakuntza egin behar izan zioten.
Oñatiko EAJk, gaitzespena
Prentsa ohar bidez, Oñatiko EAJ-k gertakariarekiko gaitzespena adierazi nahi izan du, aurretik Izaro Elorza alkateak egin zuen bezala.
EAJtik adierazi dute "indarkeria-ekintza horiek" ez dutela lekurik Oñatin, eta hau gaineratu dute: "Indarkeria, edozein modutan, erabat onartezina da, eta gizarte gisa partekatzen ditugun balioen aurkakoa". Bestetik, babesa adierazi nahi izan diete biktimei: "Gure erabateko babesa adierazi nahi diegu gertaera lazgarri honen biktimei, bai eta haien familiei eta gertukoei ere, eta sendatze azkar eta osoa opa diegu. Gure eskua luzatzen diegu gertaera tamalgarri honek kaltetutako pertsona guztiei, eta haien esanetara jartzen gara behar duten edozein laguntza emateko".
Azkenik, Oñati udalerri "abegikor, lasai eta biziz betea izaten jarraitzeko" lan egiteko konpromisoa berretsi dute.
