2023 - 2024ko partaidetzazko aurrekontuetan herritarrek proposatu eta aukeratutako proiektua da herritarrek energia-komunitateak sor ditzaten Udalak prozesua erraztea. Eta laguntza horretan, bihar, hilak 18, egingo dute lehen saio irekia. "Klimaren eta energiaren gaiarekiko kezka edo jakin-mina duen edonork har dezake parte. Saio irekia da, eta parte hartzaileak orduantxe hasiko dira energia-komunitateen bueltan sortuko litzatekeen espazioaren jardun modua zehazten", adierazi du Izaro Elorza Arregi Oñatiko alkateak. Asmoa da, lehen-lehenik, herritarrek osaturiko mahai bat eratzea, eta mahai horrek erabakiko du zein bide hartuko duten etorkizunean.
Horretarako, 40.000 euro bideratuko ditu Udalak, aholkularitza eta dinamizazio lanetarako -AISE kooperatibak egingo ditu dinamizazio lanak eta Goiener-ek emango du aholkularitza teknikoa-. "Proiektuak bete-betean egiten du bat Oñatiko Udalak iraunkortasunarekin duen konpromisoarekin. Garrantzitsua da energiaren alorrean ere herritarren partaidetzarako bitartekoak jartzea", argitu du alkateak. Xabier Igartua Loidik, zinegotzia eta Oñargiko presidentea, bestetik, energia-komunitateen onurak aipatu gura izan ditu: "Trantsizio energetikoak, energia eredua aldatu beharra dakar. Bide horretan, besteren artean, esangura handia dute energia-komunitateek: tokiko sorkuntzaren alde egiten dute, eredu demokratikoa bultzatzen da, eragina dute argindarraren fakturetan, ekarpena egiten diote tokiko ekonomiari, lagungarri dira herritarren sentsibilizaziorako...".
