Zapatuan zendu zen Xabier Ugarte, Artixa kultura elkarteko kide, euskaltzale eta gitarra-jotzaile oñatiarra, eta gaur, haren senide eta lagunak batu dira Moyua belatokian Ugarte zena agurtzeko. Omenaldi gisa, hainbat abesti jo dituzte Bixente Martinezek, Amaia Azpiazuk eta Iraia Aizpuruk, eta esker oneko hitzak besterik ez dizkiote eskaini Ugarteri.
Bertan izan dira Artixa elkarteko kideak, Ugarterekin musika eta, oro har, euskal kultura partekatu dutenak eta herritarrak, izan ere, zera azpimarratu baitute bertaratuek, Ugarte "oso maitatua" zela herrian, eta hark utzitako legatua "oso handia" izango dela.