Luis Martin-Santos Ribera. Bere garaiarekiko konprometitutako pertsona erakusketa aurkeztu dute gaur Gipuzkoako Artxibo Historiko Probintzialean. Hamalau paneletan banatu dute lana, bultzatzaileen esanetan, "Luis definitzen duten ikuspegi guztiak" jaso ahal izateko. Ramon Rubial Fundazioak eta EHUk ondu dute lana, Gipuzkoako Foru Aldundiaren laguntzarekin, eta, adierazi dutenez, "psikiatra, idazlea eta politikari sozialista" izan zen Martin-Santos.
Blanca Roncal Ramon Rubial Fundazioko presidenteordea, Amaya Izaola eta Carmen Gonzalez Guerra erakusketaren komisarioak eta Maria Jose Telleria Gipuzkoako Foru Aldundiko Kultura zuzendaria izan dira inaugurazioan. Horrez gain, hara gerturatu dira Rocio Martin-Santos eta Luis Martin-Santos ere, Martin-Santosen seme-alabak.
Ibilbidearen xehetasunak
Erakusketaren bultzatzaileek azaldu dutenez, Marianisten ikastetxean amaitu zuen Batxilergoa, Donostian, eta Salamancako Unibertsitatean lizentziatu zen medikuntzan eta kirurgian. Are, doktore titulua ere eskuratu zuen Madrilgo Unibertsitatean, eta 1952an ezkondu zen Rocio Laffon Bayorekin. "Garai hartan, aldaketa bat gertatu zen haren baitan, ez bakarrik maila pertsonalean, baina esparru profesionalean eta harreman sozialetan, literarioetan eta politikoetan ere". Haien arabera, sarritan joaten zen Donostiako Errante akademiara, "non ideia politiko dibergenteak eta erregimenaren aurkakoak biltzen ziren". "Donostiako bilera eta harreman horietatik, eta Madrilgo lagunengatik, Luisek bere ibilbide politiko eta sozial kritikoa eta konpromiso pertsonala taxutu zuten ideiak jaso zituen".
Martin-Santos lau aldiz atxilotu zuten, eta espetxean ere izan zen Carabancheleko kartzelan. Besteak beste, "jarduera subertsiboak" eragitea leporatu zioten atxiloketa aldietako batean. Azkenean, ordea, 1964an hil zen, 39 urte zituela, Gasteizen izandako auto istripu batean.
Bada, erakusketa ikusi nahi duenak urtarrilaren 4ra arte izango du aukera, 08:30etik 14:30era. Martitzenetan, aldiz, zabalagoa da ordutegia: 08:30etik 18:00etara.