Parte-hartzaileentzat goizeko zortzietan hasi zen egunari amaiera emateko, XIV. Oñatiko Laburmetrai Rallyko sari banaketa ekitaldia egin zuten atzo iluntzean jendez lepo bete zen Santa Ana antzokian. Hamabost taldek hartu dute aurten parte eta denek lortu zuten 19:00etarako lana aurkeztea.
Western-a izan da edizio honetan parte-hartzaileek landu beharreko generoa, eta bainuontzietan-eta erabiltzen den tapoia bai ala bai agertu beharreko objektua. Eta epaimahaikideen iritziz "proposamen ezberdin eta berritzaile bat" aurkezteagatik, baliabide teknikoen erabilpen "egokiagatik" eta erakutsi beharreko tokiak "modu originalean" erakusteagatik, The Pus Brothers taldearen Altxorraren bila lana izan da aurtengo sari nagusia eroan duena. Interpretazio Onenaren saria ere lan horren egileek irabazi dute.
Epaimahaiak emandako bigarren saria Kalabaza Productions taldearen Westbillaga film laburrak irabazi du eta hirugarrena, Hangover taldearen Bazatotzak, bazatotzak lanak. Hangover taldearentzat izan da baita ere Ikusleen saria ere.
Era berean, erakutsi beharreko objektuaren erabilpen onenagatik, Piktxurs taldearen Mendekua lanari eman diote Antolakuntzaren saria. Aurten rallyan parte hartu duten lan guztiak, hemen.
