Oinherrik azaldu duenez, "parte hartzea da herri hezitzaileak eraiki eta sustatzeko oinarrizko tresna", eta horretan sakontzen dihardute hamar urtez. Bizipenetatik ezagutza eta esperientzia jaso dute, baina baita galdera, zalantza eta kontraesan berriak ere. "Parte hartzearen inguruko markoa osatzeko beharra eta nahia sentitu dugu: parte hartzea haurtzaroaren kulturatik birpentsatzeko behar eta nahi bat". Haien arabera, marko bat eraikitzeko eta hori lurreratzeko aukera izan dute, eta horiek aurkeztu eta hedatzen zabaltzeko antolatu dute jardunaldia.
09:30ean hasiko dituzte jardunaldiak Oñatin, eta haurrekin esparru ezberdinetan jardunean dabiltzanen hitza entzuteko aukera izango da. Ane Ablanedok egingo du harrera, eta ondoren, Oinherriren parte diren eragile batzuek egin duten ibilbidearen kontakizuna eta ondorioak plazaratuko dituzte. Txusma Azkona eta Alfredo Hoyuelosen txanda izango da ostean, Parte hartzean heztea: intimitatetik komunera. Zer nolako parte hartzea behar dute haurrek intimitatean, parte hartzean hezteko? galderaren inguruan arituko baitira solasean bi kideak.
Esperientzia gehiagoren berri
11:30ean izango da atsedena, eta esperientzietan sakontzen jarraituko dute bertaratuek 12:00etan. Maitane Basasoro ikertzaileak Antzuolako Herri Eskolaren inguruan hitz egingo du, ikastetxeko ikasle ohi bat lagun duela. Are gehiago, nazioarteko bizipenen berri izateko aukera ere izango da, Paula Queridok Argentinako esperientziaz jardungo baitu. Hain justu, Umeen Hiriko Argentinako Sareko kidea da, Francesco Tonucci elkartekoa.
Jardunaldia borobiltzeko, berriz, marko bateratua lurreratzen arituko diren herrietako ordezkarien ahotsak entzuteko aukera izango da; eta, amaitzeko, eguneko ideiak eta kezkak jasoko dira dinamika ludiko baten bidez.
Izena emateko aukera
Jardunaldietan parte hartu nahi duenak, izena emateko aukera du jada. Oinherriren webgunean dago horretarako aukera, eta urriaren 23a da azken eguna.
