Goizean hasi ditu indusketak Gazteluaitzen Arantzadi Zientzia Elkarteak eta bihar ere han egongo dira. Erdi Aroan han egongo zen Gazteluaren bila ari dira. XVI. mendeko aipuetan Gazteluaitz izena azaltzen da tontorra izendatzeko, baina, Gazteluaren beraren erreferentziarik ez dago, beraz, uste dute lehenago desagertu zela.
Gazteluaitzeko hiru tokitan egin dituzte katak eta horietan, aztarnategi arkeologikoa badagoela argi ikusi dute. Gainera, gure arbasoak han harriak lantzen aritu izanaren zantzuak aurkitu dituzte arkeologoek. Horma txiki bat ere antzeman dute, eta gaintxoan ordokia egiteko haitzak landuta dauden zalantzarik ez dute.
Gainera, aurrez ere, erdi aroko zeramika puskak aurkitu dituzte Gazteluaitzen, baita askoz lehenagokoak ere. Izan ere, duela 4.500 urteko zeramika pusketa ere aurkitu zuten. Oraingo ekinaldian ere aurkitu dute historiaurreko zeramika zatia. Uste dute, gero berrerabilia izan zela.
