Herriko Futbol Txapelketa erdialdera iritsi da eta, lehenengo fase erregularra amaitu ostean, zehaztuta gelditu da zein taldek jokatuko duen Txanpionsa eta zeinek Kopa txapelketa. Mazedonia, Sasquatch, Weinguter, Albok, Frakas Brabas eta Sarutobi taldeak lehiatuko dira Liga Txapelketa eskuratzeko; aldiz, Iturritxo, Shatoken Moüra, Tutelatraku eta Zalaparta Kopa tituluaren bila arituko dira.
Ligako zein Kopako lehen jardunaldiak jokatu dira. Mazedoniak Weingüter hartu zuen mendean (4-2); Sasquatchek, berriz, Frakas Brabas garaitu zuen (2-1). Kopan, bestalde, Iturritxok eraman zuen neurketa Zalapartaren aurka (2-4) eta Tutelatraku taldeak Shatoken Moura garaitu zuen (1-3). Antolakuntzatik orain artekoaren balorazio positiboa egiten dute. "Momentuz, aurtengo denboraldiaren balorazio oso positiboa egiten dugu", dio Jon Ander Errastik.
Ezustekoen urtea
Balorazio positiboa egiteaz gain, ezustekoen urtea izaten ari da. Bi taldek txapelketa utzi dute, baina gazteek osatutako beste bi batu dira: Weinguter eta Sarutobi; aire freskoa eta indarra eman diote lehiaketari: "Azken urteetan beti ibili izan gara beldurrarekin taldeak desagertu egingo direlakoan eta zazpiko edo hamaikako futbol txapelketa egin beharko zen zurrumurruarekin. Baina bi talde berri hauek Herriko Futbol Txapelketa indartu egin dute eta espero dugu hurrengo urtean talde berberek jarraitzea eta ea talde berriren bat sortzen den", dio Errastik. Gainera, bi talde horiek Txanpionsa jokatzeko txartela eskuratu dute eta, lehen urtea izanik, "hori oso zaila" dela adierazi du eta "ezustekoren bat gehiago" ere egongo dela azpimarratu du.
Etorkizunerako eskakizunak
Oraindik denboraldia amaitzeko hilabete batzuk falta badira ere, antolakuntzatik etorkizunera begira jarrita daude Herriko Futbol Txapelketak urteetan zehar jarraitu dezan, eta eskakizunak ere egiten dituzte aurrera begira txapelketa sendotze aldera. "Hurrengo urtera begira, dauden taldeek jarraitu dezatela eta ea bateren bat gehiago sortzen den. Gure eskakizunak, aldiz, jendeari baino gehiago, Udalari zuzenduta doaz; ordutegi erosoagoak eskatzen dizkiogu. Txapelketako neurketak arratsaldeko zortzietan izatea ez da egokia parte-hartzaileendako eta giroarendako. Aldiz, ordutegi duinak edukiz gero, gure txapelketak sendotasuna lortuko lukeela uste dugu".
