2022a urte oparoa izan da Zubillaga-Oñati Hiltegi eta Zatitze Zerbitzuan, berriz ere Erkidego osoko eta Nafarroako baserritar eta harategiei beharrezko zerbitzua emanez. 2020-2021 ekitaldietan pandemia dela eta izandako igoeraren ondorioz, 2022koa berregituratze urtea izan da, pandemiaren aurreko erritmora itzuliz.
Zerbitzua eskaintzeko esfortzu handia
"Ekoizpenaren %26ak Gipuzkoan izan du jatorria, %8ak Araban, % 48ak Bizkaian eta %8ak Nafarroan. Zentzu honetan, Laudioko hiltegiak ateak itxi izanak bertatik etorritako baserritar eta harakinei zerbitzua eman ahal izateko egindako esfortzua kontuan hartzekoa izan da, besteak beste banaketa ibilbideak aldatuz", Zubillaga-Oñati Hiltegi eta Zatitze Zerbitzutik jakinarazi dutenez.
Gaineratu dutenez, "guztira, 1.074 ustiategiri eman dio zerbitzua Zubillaga-Oñatik, 2021ean baino 34 gutxiagori, Honen arrazoi nagusia sektoreari eragindako kanpo faktoreei egotzi ahal zaie, besteak beste horniduren krisialdiaren eraginez zenbait baserritarrek gizentzeari utzi baitiote".
Inbertsioa instalazioetan
Ekoizpenaren kalitatean fokua jarriz, 2022an hiltegira iristen diren animalien ongizatea bermatzeko inbertsioa egin zen instalazioetan. "Duela zenbait urte ukuilu eroso eta zero sufrimenduko sakrifizio metodoa ezartzeko apustua egin zen, eta 2022an kamera ezberdinak instalatu dira prozesu guztia monitorizatzeko. Horrela, abelburu bat bere instalazioetara iristen denetik, eremu bakoitzean instalatutako kameren bidez monitorizatzen da bere egonaldia, animalia lasai eta eroso egongo dela bermatuz".
Gizartean eragiten
Ekoizpenaren erritmoaz gain, 2022a gizartean eragiteko duen konpromisoa berresteko urtea izan du Zubillaga-Oñati Hiltegi eta Zatitze Zerbitzuak. Esaterako, LANBIDE-ren bitartez bere instalazioetan Animaliak hiltzea, prestatzea eta zatikatzea ikastaroa eskaini du. 180 orduko ikastaro honetan sektorearen etorkizuna bermatuko duten profesional berriak hartatzeko aukera izan da. Horrez gain, inguruko erakundeekin elkarlanerako ekimenak aurrera eraman ditu Zubillaga-Oñatik, besteak beste Euskal Herriko Unibertsitatearekin Arkume proiektuaren baita edo ULMA Inoxtruck enpresarekin karga ezberdinen manipulazioa ahalbidetzen duten ekipoen integrazioarekin. Azken urteetan Zubillaga Oñati Hiltegi eta Zatitze Zerbitzuak egiten ari den lana aitortua izan da besteak beste Spri taldearen Haziinova errekonozimenduarekin.
