Emakumeen Etxea zer den, nola funtzionatu dezakeen, zein zerbitzu edo baliabide jasotzen dituen eta zein aukera ematen duen ikusteko irteerak egin zituzten azaroan. Bi irteera izan ziren eta Gipuzkoako lau herritan egon zen hogei bat laguneko taldea: Zumaian, Azpeitian, Donostian eta Hernanin, hain zuzen ere. Hango emakume etxeak bisitatu zituzten eta horietan ikusitakoa partekatu eta esku artean dauden aukerak aztertzea eta jasotzea izango da bihar Eltzian egingo den saioaren helburua.
2020an egin zen diagnosian ikusi zen Emakumeen Etxearen beharra bazegoela Oñatin eta hori gauzatzeko fasean dago orain herria. Kale Zaharreko eraikin bat erosi zen eta gogoeta egin Udalean maila teknikoan zein politikoan. Oinarria aurkeztu zuten urrian eta bisitak egin azaroan.
Herrikoa definitzen hastea izango da hurrengo pausua, baina elkarren artean ezberdinak diren emakumeen etxeak bisitatuta, ikusitakoa eta ikasitakoa partekatu gura dute, aurretik, saio honetan. Emakumeen etxeen gaineko kokapen orokorra ere eskainiko dute. Lagungarria ikusten dute saio hori, hurrengo fasean Oñatiko proiektua definitzen hasteko. Oñatiko Emakumeen Etxeari buruz informazioa izan gura duen edozein herritar dago gonbidatuta. Saio irekia da, 11:30etik 13:30era.
