Arduradun berriek aurreratu zuten San Inazio egunerako irekita egongo zela berriro fonda eta, atzotik, dagoeneko zerbitzua ematen ari da. Bihar ere, jaieguna baliatuz, irekiko dute eta uztailaren 30etik aurrera, egunero emango dute zerbitzua, astelehenetan izan ezik, sare sozialetan adierazi dutenez.
Lehenengo egunak “ondo” joan direla azaldu du Naiara Romanetek, Peio Bilbaorekin batera aurrerantzean fondako kudeatzailea izango denak. Atzo pintxoak eta ogitartekoak bakarrik eskaini zituzten, eta gaur plater konbinatuekin ere hasi dira; afariak ere ematen dituztela nabarmendu dute.
“Gauza batzuk agortu egin zaizkigu, uste baino jende gehiagok eskatu dituelako postreak-eta. Erritmoa hartzen gabiltza”, adierazi du Romanetek. Gaineratu du jendea ilusioarekin gerturatu dela: “Aipatu digute pena ematen zuela Urbiara igo eta fonda itxita egoteak. Pozik ikusi dugu jendea, eta ulerkor gauzak agortu zaizkigunean”.