Duela hiru urte zabaldu zuen Italikual denda Maite Murgiondok. Denda zabaldu aurretik, Genovan (Italia) egin zuen ikastaro bat, pasta zelan egiten den ikasteko. Oñatiko denda bertan egindako pasta, pizza eta lasagna prestatuak saltzen ditu, baina, ondoren, norberak kozinatu behar ditu. Etxean egindako ahuntz eta ardi gazta ere baditu salgai.
Italiar jakiak saltzen dituzu.
Inguruan halakorik ez zegoelako erabaki nuen italiar produktuak saltzea. Pastari dagokionez, sinpleak eta ravioliak egiten ditut. Horiei botatzeko perretxiko eta bolognar saltsak egiten ditut. Pizzak, berriz, sei ezberdin saltzen ditut; baita barazki eta okela lasagnak ere.
Non erosten dituzu osagaiak?
Irina eta gaztak Italiatik ekartzen ditut. Pasta egiteko irina beharrean semola erabiltzen da, gutxiago txikitutako garia izaten da. Beraz, ez da samurra izaten hemen aurkitzea. Gero, gehitzeko erabiltzen ditudan barazkiak eta haragia, ordea, bertakoak izaten dira.
Pentsatu duzu euskal eta italiar errezeten fusiorik egiterik?
Ez da erraza gauza berriak asmatzea, herritarrek betiko errezetak nahi baitituzte. Esaterako, pizza berri bat egiten saiatzen naiz, baina ez du arrakasta handirik izaten. Pentsa, gehien saltzen den pizza da urdaiazpiko egosia gaztarekin.
Debagoienean badago ohiturarik janari prestatua erosteko?
Agian, ez asteko egun guztietarako, baina bai. Ostiral gauetan pizza jatea oso hedatuta dago, adibidez. Momentu batzuetan, beharrezkoa da gizarte honetan.
Pasta egosita jateko ohitura dago. Badago beste modurik?
Pasta betea oso goxoa geratzen da frijituta olio eta berakatz apur batekin. Buelta eta buelta eman behar zaio zartaginean, aurretik egosi barik.
Pizza ananarekin ala gabe?
Ni ez naiz anana-zalea, eta neuk egindako pizzei ere ez diet botatzen. Hori aldatze arren, pizza sagarduna egiten dut; sagarra gorgonzola gaztarekin. Ananak sortzen duen efektu gazi-gozo hori sorrarazten du.
Zure lanaren alderik onena?
Jendearen esker ona. Asko eskertzen dute produktu ona jatea, eta hori garrantzitsua da. Jende asko dago asteroko bezeroa dena, eta eskertu egiten dituzte norberak eginiko produktuak.
Baduzu ohiturarik bailarako saltokietan erosteko?
Beti ahalegintzen naiz bertan erosten. Inguruan badaude beste denda batzuk, eta elkarri erosten dizkiogu produktuak. Hori garrantzitsua da.
Pasta egosteko, ez bota oliorik
"Nik egindako produktuak freskoak dira eta ez daukate kontserbagarririk; beraz, hozkailuan bost edo sei egun egon daitezke. Hortik aurrera, izozkailuan gorde behar dira, gehienez bi hilabetez. Egosteko, kontuan hartu behar da freskoa denez, sinpleek minutu eta erdi bi minutu nahikoa dute; ravioliek, aldiz, hiru minutu. Egosteko, uretara gatza bota bakarrik, oliorik ez. Behin pasta egosita, saltsara bota zuzenean eta listo".
