Oñatiko EAJ-k gogorarazi du, legegintzaldia amaitzeko urtebete falta denean, "hainbat proiektu inolako zehaztasunik eta aurrekontu-partidarik gabe planteatzea kea saltzea eta behar batzuei ateak ixtea dela". 2021eko soberakina 6.324.258 eurokoa izan zen, eta Udal gobernuak 3.098.014 euro hiru proiektu nagusitara bideratzea proposatu du: Emakumeen Etxera , Musika Eskolara eta Urrutxuko zabortegia zigilatzera.
Hiru proposamen horiek Oñatirentzat "beharrezkoak" direla onartu du EAJ-k, baina adierazi du "gobernuaren kudeaketa faltaren ondorioz" oraindik ez dakitela proiektu horietako bakoitzera zenbat bideratuko den, "ezta gutxi gorabehera ere". Alderdi jeltzaleak Musika Eskolaren proiektua jarri du adibide gisa: "Oraindik ez dute diagnostikoa egiten amaitu eta kronogramari erreparatzen badiogu, atzeratzen ari garela ikusiko dugu. Proiektu honi lehentasuna ematea eskatzen dugu, 2022-2023 ikasturtean Musika Eskola berriaren obrekin hasi nahi bada".
Azkoagain, landa-mendiak, atletismo pista eta Zubillagako zubia
Soberakina bideratze aldera, lau proposamen egin ditu EAJ-k. Lehenengoak Oñatiko futbol zelaiarekin du zerikusia: "EH Bilduk Azkoagaingo arazoa konpontzen ez duten adabaki ezberdinak proposatzen ditu, aldi baterakoak. Zuzenketetan proposatu genuen 15.000€ erabiltzea kirol-ekipamenduetarako kokapen posibleei buruzko azterketa bat egiteko; onartu bazuten ere oraindik ez dira diagnostikoarekin hasi. Gure ustez, konponbidea behin betikoa izan behar da, eta horregatik eskatzen dugu 350.000 euroko partida ekonomiko bat aurreikustea kirol-ekipamendua instalatzeko lursailen erosketarako, Udalak ez baitu lursailik behar horiek asetzeko, eta horrela, segurtasunez laster sortuko diren beharrak planifikatu eta aurreratu behar ditu Udalak, Aloñari lehenbailehen irtenbidea eman nahi bazaio behintzat".
Bigarren proposamenak landa-mendien digitalizazioa jasotzen du: "Gaur egun, lursailak mugarriz mugatuta daude. Katastroko hainbat aplikaziotan aurki ditzakegu, baina guztiak 50eko hamarkadan ateratako airetik ateratako argazkietan oinarrituta daude. Gaur egun, GPS teknologiei esker, koordenatuen bidez muga daitezke lursailak, eta errealitatera zehatz-mehatz egokitzen dira. Gure ustez, proiektu hau lau eta bost urte arteko epean gauzatu beharko litzateke, eta, beraz, urtean 120.000 euroko partida bat eskatzen dugu».
Atletismoko pista egiteko proiektua egitea da EAJ-PNVren beste proposamenetako bat: "Gaur egun oñatiarrak udalerriz aldatu behar dira kirol hau praktikatzeko. 50.000 euro bideratzea eskatzen dugu".
Eta, azkenik, 62.000 euro Zubillagako trenbidearen zubi zaharra zabaltzeko erabiltzea ere proposatu du alderdi jeltzaleak: «Horrela, baserritarrak arazorik gabe sartuko lirateke inguruko baserri eta mendietara».
EH Bilduk beste zortzi proposamen aurkeztu ditu
Martxoko Osoko Bilkuran EH Bilduren Udal gobernuak 1.727.714 euroko zortzi proposamen berri aurkeztu zituen: kiroldegiko obren prestamoaren 2023ko kuota aurreratzeko (785.000 euro), Euskaltegiko inbertsioak egiteko, Azkoagainen hobekuntzak egiteko,
Urgainen obrak egiteko, brigadarako kamioi berri bat erosteko, Arantzazu auzoko ur-horniduraren sarerako inbertsioak egiteko, Araotz auzoko ostatuko aparkalekua urbanizatzeko (85.000 euro) eta Torreauzoko bidegorrirako zubia egiteko.
Proposamen horien inguruan, EAJ-k Torreauzoko bidegorriari behin betiko irtenbidea emateko beharra azpimarratu du: "Ados gaude Torreauzoko zubirako 250.000 euro erabiltzearekin. Aspalditik ari gara eskaera hori egiten, eta badirudi azkenean aurrerapausoak emango direla".
Landa auzoetara bideratutako proposamenei dagokienez, alderdi jeltzaleak dio ez dela nahikoa: "Auzoetarako partida 164.000 eurotan handitzea eskatu dugu, auzo-alkateen eskaera da eta lehen ere eskatu genuena". Bestalde, Udalak ez omen du "aurreikusi" Zubillagako trenbide zaharraren zubia handitzea: "Guztiok dakigun bezala, egungo zubiaren zabalerak asko zailtzen du inguruko baserri eta mendietara iristea. Zubillaga auzoko bizilagunek proiektua ordaindu zuten, haren beharra agerian utziz, eta EH Bilduko gobernu taldeak entzungor egiten jarraitzen du, nahiz eta proiektua auzatzeko kostua oso handia ez izan, 62.000 €".
Azkenik, alderdi jeltzaleak eskatu du kiroldegiko maileguaren amortizazioa berriro aurreratu beharrean, diru hori eskura izatea, adibidez, "auzoetako eskaerei irteera emateko".
