Urtebete bete da gaur Arantzazulab Gizarte Berrikuntzako Laborategiak Arantzazuko Gandiaga Topagunean ateak ireki zituenetik. Lehen urtemugaren harira, proiektuaren sustatzaile diren bost organoetako arduradunak –Gipuzkoako Foru Aldundia, Mondragon Korporazioa, Kutxa Fundazioa, Oñatiko Udala eta Arantzazuko Frantziskotarren Probintzia– Naiara Goia laborategiko zuzendari nagusiarekin bildu dira. Laborategiaren lehen hamabi hilabeteetako balantzea egitea izan da batzarraren xedea.
Gipuzkoako Foru Aldundiak prentsa ohar bidez adierazi duenez, misio argi batekin sortu zen zentroa: "Elkarlaneko gobernantzaren inguruan ezagutza garatzeko gure herriko gunerik garrantzitsuena izatea, herrigintzaren, erakunde sistemaren eta gizarte eragileen zerbitzura egongo dena". Bada, lehen hamabi hilabeteetan erreferentzialtasun hori lortzeko "oinarri sendoa" jartzen hasi dela adierazi du Markel Olano Gipuzkoako diputatu nagusiak.
Neutraltasunetik nazioartera
Adostasun zabalen gune izateko, sentsibilitate eta ikuskera ezberdinak batzeko, zein Euskal Herriko kultura politiko ezberdinekin lan egiteko espazio gisa sortu zen Arantzazulab. Aniztasun eta neutraltasun horretan jarri du enfasia Olanok: "Topagune Neutral izaeraren aitortza nabarmendu nahiko nuke; hainbat eragilek hausnarketa askerako topagune eta esperimentazio berritzailerako babes gune gisa definitu dute". Bide horretan, gaineratu du inguru hurbilean zein nazioartean "arreta piztu" duela laborategiaren jardunak.
Urteurrena, datutan
Ikerketaren, esperimentazioaren zein dibulgazioaren ildoak landuz, 165 eragile baino gehiagorekin egin du kontaktua berrikuntza zentroak lehen urtean. Horietatik 85 elkarlanean aritu dira, 7 batzordetan parte hartzen, eta 9k lankidetza hitzarmena sinatu dute. Ikerketan, esaterako, 40 ikertzaile baino gehiago bildu dituen topaketak egin dira; esperimentazioan 20 eragile baino gehiago elkartu dira Arantzazulab-en "ekosisteman"; eta, azkenik, dibulgazioan, 18 forotan hartu du parte laborategiak, 9 formakuntza programa emateaz gain.