Zaldibarko Belar mintegikoek zioten "nahikoa ondo" saldu dutela, "betiko antzera, apur bat gutxiago, agian". Gehien saldu dituztenen artean, "sagarrondoak, laranjondoak eta limoiondoak", adierazi dutenez.
Fruitu txikiekin egiten du, ostera, lan Zarauzko Giroa mintegiak. Hauen eskaintzatik arrakasta handiena izan dutenak mugurdiak –frambuesa– eta ahabiak –arandano– izan dira, azaldu dutenez. Salmentak "nahikoa ondo" joan ei zaizkie horiei ere.
Natur Eskolako Aimar Uribesalgo ere konforme zen azokak emandakoarekin: "Sei mintegi izan ditugu, eta denetik ekarri dute: fruta arbolak, bestelako zuhaitzak, Euskal Herriko hazi ekologikoak –bakarrak– ekarri dituzte Alekakoek, fruitu gorriak ere izan dira...".
Salmentak eta jendea ohi baino apalagotik joan arren, azoka ondo atera dela zioen Uribesalgok.