Bi buru, norabide bakarra
Hiru hamarkadatik gora daramatza Eguzkialde Enbalajeak enpresak Oñatin. Olabarrietako auzoan egin zituen hastapenak; baita duela 17 urte errelebo aldaketa ere. Ez zen, baina, gauetik egunerako iraultzarik izan. "Jatorri, molde eta produktuak mantendu ditugu, eta pixkanaka, egungo errealitatera egokitzen ahalegindu gara". Nola bezeroen beharretan, hala komunikazio molde eta komunitateari egindako ekarpenetan.
2013an etorri zen aldaketa nagusia: bidegorria zela eta, Olabarrietatik Goribar auzora joan behar izan zuten. Torreauzoko bidegurutzearen alboan errotu dituzte sustraiak geroztik.
Bailara oinarri
Lehengaien jatorria anitza izan ohi den arren, bailaratik, bailarakoekin eta bailarakoentzat dihardu lanean enpresa oñatiarrak. Debagoiendarrak dira langile guztiak, eta uneotan, baita zurezko kutxez, kaiolez, oinarriez, enbalaje bereziez, paletez eta takoez hornitzen dituzten bezero guztiak ere. Eskertuta daude hamarkadetan osatu duten komunitateari, eskertuta elkarlanari.
Eta bailara saretzen jarraitzeko erabakia hartu dute. Hala egiten dute Aloña Mendiko futbol sailarekin, baita Aloñako Igoerarekin. Goienakide izaera bilakaera horretan egindako urrats bat gehiago da. Mantso baina irmo, bidea egiten jarraitzea baita xedea.
