Oñatiko hitanoa ikasteko aplikazioa da Appa hi!. Android telefonoetarako prestatu zuten lehenengo eta arrakasta handia izan du, 700 aldiz deskargatu dute. Orain iPhone-etan ere deskargatu daiteke. Badihardugu euskara elkarteak garatu du, CodeSyntax-ekin elkarlanean eta Oñatiko Udalari esker.
35 egunean, egunero pilula batean, informazioa ematen da: azalpena, marrazkiak –Mirari Sargazazurenak– eta bideoak, adibideekin –Ingo Xonau! taldeak oñatiarrei egindako grabazioak–. Galdera edo ariketa bat ere etorriko da gero. Aukera ezberdinak eskainiko zaizkio erabiltzaileari, eta, zuzen erantzunez gero, hurrengo egunean beste pilula bat egiteko moduan egongo da. Erantzuna okerra bada, berriz saiatu ahal da. Bost maila daude, guztira. Bakoitzak bere erritmora jolas eta ikas dezake.
