Azken urtetako bere lan-bizitzari bultzada eman nahian, Jabier Erostarbe ilustratzaile eta diseinatzaile grafiko oñatiarrak erakusketa zabaldu du kultura etxean, egin dituen bere lanak erakusteko. "Uste duzu denek dakitela zelako lanak egiten dituzun, baina konturatu naiz badagoela jendea zein lan egiten dudan interesatzen zaiona eta ez duena ezagutzen egiten ditudan arlo guztietako lanak zeintzuk diren. Beraz, askotariko nire lanak ikustarazteko jarri dut erakusketa", azaldu du. Bere asmoa zen San Lorentzo 10ean duela 26 urte zabaldu zuen estudioak 25 urte betetzean jartzea erakusketa, baina, pandemiak baldintzatuta, urtebete atzeratu behar izan du erakusketa, nahiz eta arte grafikoen munduan denbora gehiago daraman lanean.
Askotariko lanak
Kartelak, esku-orriak, kamisetak... Askotariko lan ezagunak daude erakusketan. Baina, batez ere, hiru arlotara bideratutakoak egiten ditu Erostarbek. Alde batetik, industria enpresetarako egin izan dituen lanak ikus daitezke; Ulma Taldearendako egindakoak edota Ternua enpresarendako egindako kamiseten
edota trekking bastoien diseinuak. Kulturara bideratuta, herriko turismoa ezagutarazteko edo jaietarako egindako kartelak ere ikus daitezke. Eta azkenik, hezkuntza mundura zuzendutakoak ere ikus daitezke; Mondragon Unibertsitatearendako edo herriko ikastetxeendako lan egiten du, adibidez.
Bezero bakoitzarendako lan zehatzak egiten ditu; zeka taldearendako zentimetro gutxiko zigilu bat diseina dezake, edota baita hamabi metrotako batzar nagusiak egiteko gela baten diseinuak ere. "Pertsona bakoitzak bere bidea aurkitu behar du, eta estilo bat sortu. Uste dut badagoela estilo zehatz bat nire lan guztien atzean", adierazi du Erostarbek, eta hauxe gaineratu: "Heldutasunak edo esperientziak asko ematen dizu eta teknikoki ere estiloa aberastu egiten da".
Atzetik dagoen lana
Erakusketan azken produktuak ikus daitezke, baina horra iritsi aurretik atzetik dagoen lana ere bai. Horren adibide gisa jarri du, esaterako, eskola kirolerako logoaren lan-prozesu guztia ikusgai. "Arkatza eta eskua baino azkarragoa ez da ordenagailua. Gero, egia da lana hobetu daitekeela digitalizazioarekin, baina hasiera beti arkatzarekin eta paperarekin egiten dut", zehaztu du. Hilaren 31ra arte egongo da ikusgai erakusketa.
