Pandemiagatik bigarren aldiz, aurten ere ez dira herriko jai nagusiak ospatuko. "Helduko dira San Migelak eta Errosaixoak elkarrekin ospatzeko egunak, baina, bitartean, azken ahalegina egin beharrean gaude", azaldu du Iñaki Olalde Altzelaik, Kultura zinegotziak.
Aste barruan ere bai
Jaien ordez, eskaintza kulturala egongo da San Migel eta Errosaixo egunen bueltan, plaza ondoan jarri duten karpan ez ezik, Zubikoa kiroldegian, Etxaluzen eta txosnagunean. Izan ere, egoera oraindik pandemikoa den arren, joan den urtean baino hobea da eta hainbat herri eragile ere animatu dira ekintzak antolatzera, pandemia aurretik egin ohi zuten moduan. Txosna batzordea da horietako bat. Karpa handi bat jarri du Irunberri plazan eta hantxe egingo dituzte antolatutako ekitaldiak; zuzeneko hainbat musika kontzertu, tartean. Nekazarien Elkarteak antolatuta gazta lehiaketa eta dastatzea egingo da aurten, eta baita umeen danborrada eta artzain txakur txapelketa ere. "Eragile horiek antolatutako ekintzekin bete da gure kultura eskaintza. Joan den urtean, asteburu ezberdinetan egin ziren emanaldiak, baina aurten, aste barruan egitearen alde egin dugu, Oñatiko lantegi eta komertzio askoren egutegietan jaiegunak diren egunetan. Herritarrendako kultura eskaintza izango da eta herritarrek disfrutatzea gurako genuke, zentzuz jokatuz", gaineratu du Kultura zinegotziak. COVID-19aren kontrako prebentzio neurri guztiak bermatuz gauzatuko da egitarauan jasota dagoena, eta, egon daitezkeen aldaketei dagokienez, kontuan hartuko dituztela adierazi du Olaldek: "Oso aintzat hartua izango dugu unean uneko egoera. Moldaketarik egin beharra balego, moldatu egingo genuke. Halaxe eskatzen du egoerak". Ekitaldien ordutegia, baina, mantendu egingo dute, malgutzen badute ere.
Udal zerbitzuak, itxita
San Migel eguna, irailak 29, jaieguna izaten da Oñatin, eta, hori horrela, datozen egunetan itxita egongo dira udal zerbitzuak. Kiroldegia, liburutegia eta Herritarren Arreta Zerbitzua, esaterako, itxita egongo dira irailaren 29an eta 30ean, eta baita urriaren 2an, 3an eta 4an ere. Zubikoa kiroldegian, gainera, garbiketa lanak egingo dituzte urriko lehen astean, eta urriaren 8an zabalduko dute. Udal zerbitzuak ez ezik, herriko lantegiak eta dendak ere itxita egongo dira edo ezohiko ordu-tegia izango dute.
