Berez, iazko udazkenean egin behar zen aitortza ekitaldi hori, 2019an 25, 40, 50 eta 75 odol-emate egin zituztenei esker ona adierazteko. Baina pandemiagatik ezin izan zen egin, eta gaurko odol ateratzean egingo dute, 18:15ean, Mondragon Unibertsitateko fakultatean. Guztira, Oñatiko hamalau odol emaile omenduko dituzte: zazpik 25 aldiz eman dute odola, batek 40 aldiz, bik 50 aldiz eta lauk, berriz, 75 aldiz.
300 odol poltsa egunean
Euskalduna odol emaile "fidela" dela dio Gipuzkoako Odol Emaileen Elkarteko presidente Sabin Urzelayk, Euskadiko %3 dela odol emaile, baina odola beharrezkoa dela gogorarazi eta azpimarratu gura izan du: "Eus-kadin, egunean, 300 bat odol-poltsa behar dira eta ezin da ahaztu odola 42 egunera iraungi egiten dela".
Oñatiko elkarteko kideak ere behar horren jakitun dira, eta horregatik dei egiten diete emaile direnei, tarteka ez bada ere, odola ematera joateko, eta oraindik egin ez direnei, odol ateratze batera joan eta emaile egiteko. Gaur, 16:30etik 20:00etara egongo dira MUko Enpresagintza fakultatean.
