Larru Beltzak talde oñatiarrak sare sozialetan adierazi du "atsekabez eta amorru handiz, zentzugabekeria handi bat dela-eta", hilaren 10ean eta 11n Antixena gaztetxean eman behar zituzten kontzertuak atzeratu beharrean daudela. Emanaldiak noiz eskainiko dituzten ez dakiten arren, egin egingo direla ziurtatu dute. Data berria jartzean jadanik sarrerak erosi dituztenek tokia izango dute kontzertuan, eta sarrerak itzuli nahi dituztenek "ez dute horretarako arazorik edukiko".
Larru Beltzekoek Antixena gaztetxeko kideei elkartasuna adierazi eta herritarrei bertan antolatzen diren ekintzetan parte hartzera deitu diete, "toki seguru eta beharrezkoa delako".
Asanblada, bihar
Bihar arratsaldean, 17:00etan, asanblada irekia antolatu dute gaztetxeko kideek plazan, bizi duten egoerari buruz hausnartu eta eztabaidatzeko.
