Sare sozialetan zabaldu duten oharraren bidez horrela azaldu dute Oñatiko gaztetxeko asanbladako kideek goizean gertatutakoa: "Ohi bezala, segurtasun neurri zorrotzak mantentzera eta mantendu araztera konprometitu gara, horrelako kultura egitasmoak eskatzen dituen neurriak hartuta. Egitaraua airea librean antolatu dugu, beste barra bat egokitu dugu jende pilaketak ekiditeko eta antolakuntza lanetarako jende gehiago lotu ere bai, segurtasun neurriak ondo betetzeko".
Antolatzaileek adierazi moduan, 11:00etan, bost ertzain hurbildu dira gaztetxera. "Arduradunengatik galdetu ondoren, asanbladako hiru kide identifikatu dituzte. Ertzainekin negoziatu ondoren, lizentziarik ez dugunaren aitzakia hartuta, eguna zapuztu eta edariak eta janaria zerbitzatzea debekatu digute. Ondorioz, jarri dizkiguten traben ondorioz, ezin dugu nahi genuen moduan –aurten Korrikarik egingo ez denez–, AEK-k horren beharrezkoa duen dirua lortu".
Bihar, domeka, elkarretaratzea egingo dute Foruen plazan, 13:00etan, Gaztetxearen aurkako erasorik ez! lelopean.
Kontzertuekin aurrera
Ertzantzatik baieztatu egin dute gaur goizean Antixena asanbladako hiru lagun identifikatu dituztela baina gaineratu dute, "segurtasun neurriak betetzen ari zirela ikusi dutenez, ekimeneko antolatzaileei kontzertuekin aurrera egiteko aukera eman dietela"; hori horrela, 13:00etan Nikotina taldearen emanaldia izan da, eta 18:00etan hasiko da Kai Nakai musikariarena.
